Krúttfærsla

Ég hef verið frekar löt á blogginu undanfarið. Hef verið upptekin af einhverju allt öðru. Er mikið í handavinnu þessa dagana, prjóna, prjóna, prjóna og sauma gardínur. Bara gaman. Nýti mér síðustu metrana af vetrinum í þetta. Svo kasta ég öllu frá mér og fer út að skoða tilhugalíf plantnanna þegar vorlyktin kemur í loftið.

Stelpurnar voru lasnar til skiptis alla síðustu viku. Fengu hálsbólgu, kvef og hita. Ég hélt að ég hefði sagt upp þessum pestum, en varð að næla mér í smá afleggjara af þessu líka. Held samt að allir séu orðnir sprækir aftur núna. 

Við Eydís áttum notalega daga saman. Hún var ekki það lasin að við gátum spilað. Henni finnst mest gaman að spila Olsen.

Spilaáhugann hefur hún fengið með genunum. Hún minnir mig oft á Nennu ömmu mína heitna. Hún hefur sömu hreyfingar og takta og hún. Ekki leiðum að líkjast þar skal ég segja ykkur 

Svo var mikið litað, teiknað og málað. Og þar sem Eydís er, þar er Dorrit Engill líka  

"Mamma, ég ætla að verða dýralæknir" sagði Eydís við mig í kvöld. Það kæmi ekkert á óvart miðað við hvað hún hefur mikinn áhuga á að spá í dýrin  Og litla skottið leyfir henni að dröslast með sig um allt

Svo er hárgreiðsla líka í uppáhaldi hjá ungum konum

Ég er komin í orlof og við hefur tekið alvöru "pappírstígrisdýr"  

Hmmm...kunnuglegt andlit...skildi hún nokkuð vera með heimþrá?

Þetta er sparnaðarráð í kreppunni. Nýi pappírstætarinn minn  ´

Dorrit litla Englakisa er liðtæk á öllum sviðum. Hér aðstoðar hún mig við prjónaskapinn.

Hér er ein afurðin. Fanný vinkona er svo flott fyrirsæta að hún var að sjálfsögðu fengin í myndatöku. Fallegt veðrið og gott að búa í sveitinni. Maður þarf bara að fara út í garð og er kominn í paradís  

Dorrit gefst ekkert upp á að reyna að nálgast Simba. Hann er ekkert allt of hrifinn af þessum litla fjörkálfi en stundum tekst henni að lauma sér að honum.

Atli frændi stelpnanna er búinn að vera hjá okkur síðan á föstudaginn. Hér eru hann og Þórdís í fyrirsætuleik með sjal sem ég prjónaði. Stelpunum finnst voða gaman að hafa hann og hann hefur gott lag á þeim. Ég er ekki viss um að ég ætli neitt að skila honum...voða gott að hafa svona aðstoðarmann á heimilinu  

Ég bíð spennt eftir að sjá hvað ný ríkisstjórn getur gert fyrir okkur. Vonandi eru betri tímar framundan, ég hef trú á því. Eigið góða viku elskurnar

Athugasemdir

[Jónína Dúadóttir, 3.2.2009 kl. 07:13]

Gaman að fá lífsmark frá þér ljúfan mínSkemmtilegar myndir og viðfangsefnin frábær og fallegEigðu góða viku líka og góða skemmtun við prjónana

[Ásthildur Cesil Þórðardóttir, 3.2.2009 kl. 10:40]

Frábærar myndir Sigrún mín.  Stelpurnar eru auðvitað bara að ná sér í mótefni fyrir lífið.  FLott fyrirsæta og flott peysa, flottastar af öllu eru samt leikfélagarnir Dorrit og Eydís og Þórdís englabörn.  Fyndið að sjá litla kettlingin leika sér í garninu þínu

[Sigrún Þorbjörnsdóttir, 3.2.2009 kl. 13:02]

Jónína mín; takk fyrir. Ég skemmti mér alltaf vel við prjónaskap

Ásthildur mín; takk fyrir. Þær eru æðislegar saman leikfélagarnir. Hehe, já Dorrit er mjög iðin við að hjálpa til með garnið

[Ragnhildur Jónsdóttir, 3.2.2009 kl. 16:13]

Mikið svakalega er Dorrit Engill flink að prjóna Það er svo gott að hafa eitthvað að gera í höndunum, prjóna, hekla eða sauma talandi um það þá fer að nálgast að fuglamyndin verði tilbúin

Gott að sjá færslu frá þér Sigrún. Ég og Dúfa ;-) biðjum kærlega að heilsa ykkur öllum

[Sigrún Þorbjörnsdóttir, 3.2.2009 kl. 17:53]

Ragnhildur mín; það veitir mér hugarró að dútla mér við handavinnu, fyrir utan það hvað það er gaman að skapa og hanna sjálf flíkur á fjölskylduna og næsta nágrenni  Fuglamyndin verður þá kannski tilbúin þegar mamma fer í sauðburðinn. Þú lætur mig bara vita, ekkert stress hér  Við biðjum að heilsa Dúfu líka og svo öllum hinum

[Helga Magnúsdóttir, 3.2.2009 kl. 20:25]

Yndislegur þessi litli kettlingur. Við höfum verið að spá í að fá okkur kettling en erum ekki viss um hvað sú gamla segði við því.

[Sigrún Þorbjörnsdóttir, 3.2.2009 kl. 20:40]

Helga mín; já hún er algjört krútt. Ég hef heyrt marga tala um að kettir fari í fýlu þegar "nýr" köttur mætir á svæðið. Ég held samt að þeir jafni sig alveg á endanum, það ætla ég a.m.k. að vona! Ef þú ert heit, þá geturðu kíkt á síðuna hennar Ragnhildar bloggvinkonu, ég held að hún eigi 4 krútt eftir af 11

[Tiger, 4.2.2009 kl. 01:13]

  Frábærar myndir hjá þér og skemmtilegar líka. Það er ekki að spyrja að því með blessaða ungana - þeir draga bara að sér hinar ótrúlegustu flensur - alveg sama hve mikið maður reynir að loka þær úti - flensurnar sko. Er samt handviss um að þær hafi haft það ljúft með múttunni heima við spil og prjónaskap - þar sem myndarskapinn vantar ekki sko. Flott peysa á flottri fyrirsætunni .. wúha!

Alveg brilljant þessi litli köttur - best geymdur í ruslinu sko... neinei, bara djók. En hann er flottur þessi köttur og greinilega mikill fjörkálfur..

Knús og kram ..

[Sigrún Þorbjörnsdóttir, 4.2.2009 kl. 11:03]

Tiger minn; takk. Við höfðum það mjög ljúft saman. Stelpurnar verða ekkert oft lasnar, það er bara mamman sem á auðveldara með að krækja í pestar heldur en að losna við þær aftur sko! En það kemur með tímanum.

Ég var að spá í að stofna nýtt fyrirtæki; Vistvæn gagnaeyðing ehf. Gæti tekið að mér ýmisleg verkefni t.d. fyrir Glitni, Kaupþing eða Seðlabankann. Fljót og örugg eyðing gagna á vistvænan hátt. Spurning hvort ég verði kærð fyrir að hafa kettling í vinnu..

[Tiger, 5.2.2009 kl. 17:08]

Hahaha .. vistvæn gagnaeyðing ... viss um að Davíð Oddsson mun verða fyrsti viðskiptavinurinn - og spurning um hvort þú ráðir nokkuð við aðra viðskiptavini á meðan þú ert með DO - því það er örugglega svo miklu sem hann þarf að koma undan og í felur .. múhaha!

Hugsa að þú komist upp með að hafa kettlinginn í þrælkun hvað þetta varðar - Davíð myndi sjá til þess sko ...

[Sigrún Þorbjörnsdóttir, 5.2.2009 kl. 19:24]

Haha, já DO yrði kúnni númer eitt og sennilega myndi hann alveg sjá til þess að dýrið hefði vinnufrið  Verkefnin væru ekkert af skornum skammti, gæti örugglega skaffað einhverjum vinnu við að "mata" dýrið.