Uppeldi sem virkar

Við hjónakornin skelltum okkur á námskeið sem heitir Uppeldi sem virkar-færni til framtíðar. Námskeiðið er fjögur skipti, einu sinni í viku og erum við búin að fara tvisvar. Ekki svo að skilja að stelpuskotturnar okkar séu neitt óþekkar og erfiðar. Þær eru að sjálfsögðu fullkomnar  Það eru bara við foreldrarnir sem erum svo erfið, eða þannig sko. Þetta er mjög skemmtilegt námskeið sem haldið er af sálfræðing og þroskaþjálfa. Það er alltaf gott að bæta við sig þekkingu og skoða sjálfan sig. Þetta styrkir mig í foreldrahlutverkinu, bæði sé ég hvað ég er að gera rétt og líka það sem ég get gert betur.

Talandi um uppeldi sem virkar, hehe, þá man ég alltaf eftir trixi sem virkaði á mig þegar ég var krakki. Ég var óskaplega löt við að taka til í herberginu mínu. Gerði það ekki sjálfviljug. Eddi frændi, bróðir hans pabba, bjó hjá okkur um tíma. Hann var á þeim tíma ekki sérlegur snyrtipinni og mér fannst alltaf hræðilegt að koma inn í herbergið hans. Fýlan af gömlum dagblöðum og sígarettum var alveg yfirþyrmandi  Einhvern tíman þegar ég var ófáanleg til að taka til í herberginu mínu, var mér gert það ljóst, að ég yrði þá bara flutt í herbergið til Edda, við gætum haft þar sameininlega svínastíu. Mér er sagt að ég hafi farið með þjósti inn í herbergið mitt og byrjað strax að taka til  Ekki fylgir sögunni hvort þetta hafi dugað framvegis. En svo var gert óspart grín að því fyrir tíu árum, því þá nefnilega flutti ég heim til Edda  Ekki samt að það hafi verið fyrir sóðaskap að ég var send til hans, heldur var ég í húsnæðisvandræðum á þeim tíma, og bjó ég hjá honum í þrjá mánuði.

Ég er annars í sjálfskipaðri leti núna. Er búin að vera slöpp síðan á mánudag og með smá hita. Hef sofið eins og sveskja allan daginn.

En þessar dömur eru hressar! Þær ganga bara sjálfala á meðan, eða svona næstum því  En þær eru svo góðar við mömmu sína, stjana við mig. Og ég var svo heppin að mamma kom í gær og hún gat sótt stelpurnar fyrir mig og verið hér heima þangað til Steini kom heim. Held ég sé eitthvað að rjátla við núna. Get að minnsta kosti haldið mér vakandi.

      Hafið góða daga      

Athugasemdir

[Jónína Dúadóttir, 19.11.2008 kl. 13:52]

Þú heppin að hafa svona yndislegar litlar dúllur til að stjana við þigLáttu þér nú batna mín kæra

[Sigrún Þorbjörnsdóttir, 19.11.2008 kl. 15:32]

Já þetta eru algjörar dúllur, skottast bara í kringum mig. Ég rís upp úr sófanum ef ég þarf að stoppa slagsmál  Ég verð vonandi fljót að jafna mig, er bara stillt þangað til

[Helga Magnúsdóttir, 20.11.2008 kl. 12:59]

Um að gera að láta stjana við sig, lasin eða ekki lasin.

[Tiger, 20.11.2008 kl. 13:19]

Þær eru glæsilegar þessar litlu skvísur - enda ekkert skrítið þegar múttan gamla er sjálf svoddan skutla ..

En satt, maður getur endalaust verið að læra og bæta sjálfan sig. Ótrúlegustu hlutir - sem virðast oftast vera réttir og sannir - geta komið manni á óvart með því að vera snarvitlausir þegar maður fer að fá aðra sýn á málin. Oftar en ekki heldur maður að maður sé með allt á hreinu - en oft kemur annað á daginn!

En, knús á þig skottan mín og farðu vel með þig í kuldanum!

[Sigrún Þorbjörnsdóttir, 20.11.2008 kl. 14:27]

Helga mín; Góður, ég þarf bara að læra betur á það að láta stjana við mig

Tiger;  Skutla, já, ég tek það strax til mín  Við höfum öll gott af því að skoða aðeins ofan í hálsmálið á okkur sjálfum, þannig getur maður bætt sig. Ég er innpökkuð í bómull