Beðið eftir jólunum

Jólin nálgast óðum og nú fer spennan að gera vart við sig hjá litlum stubbum. Ég var eiginlega bara að fatta það áðan hvað það er stutt í jólin, þegar stelpurnar fóru að sofa og settu skóinn út í glugga. Ég ætlaði að vera löngu búin að kaupa allar jólagjafir en í staðinn er ég búin að vera lasin meira og minna síðasta mánuðinn. Ég fór í blóðprufu í síðustu viku og þar kom fram að ég væri algjört gæðablóð. Læknirinn sagði að ég væri bara eins og fjórtán ára, svo ekki láta ykkur bregða þótt ég verði með einhverja gelgjutakta hérna  Svo ég hlýt bara að fara að verða alveg hress. Ætla að leyfa helginni að líða áður en ég veð af stað í jólastúss. Ætla samt ekkert að fara neinum hamförum í búðum. Er líka búin að bauka ýmisleg leyndarmál, kru, en það finnst mér vera eitt það skemmtilegasta við jólaundirbúninginn  

Svo er heilmikið um að vera á leikskólanum fyrir jólin

Ég fór í jólakaffi á Haga í gær, en Hagi er heimastofan hennar Þórdísar. Hér er þessi fallegi kór að syngja fyrir foreldra. Þórdís stóð sig vel og leiddi sönginn. Hún er algjör söngfugl og var ekkert feimin.

Svo spiluður krakkarnir á "gólftrommu" og sungu fyrir okkur. Tónlistartímar með Stínu á leikskólanum eru mjög vinsælir og gleðin skein úr öllum andlitum  

Í dag var jólakaffi hjá Hlíð, en Hlíð er heimastofan hennar Eydísar. Mér finnst miklu skemmtilegra þegar hver heimastofa hefur sitt foreldrakaffi, því áður vorum við á hlaupum á milli stofa til að vera með alls staðar. Nú fær hvert barn "sinn" dag með foreldrunum. Eydís stóð bara með í söngnum en var of feimin við að syngja fyrir framan allt fólkið. Svo spiluðu þau á hljóðfæri og þá var hún með.

Svo var að sjálfsögðu boðið uppá kaffi, mjólk og smákökur sem börnin bökuðu. Eydísi fannst voða fínn bollinn sem hún fékk, með haldi. Hún var eins og fínasta frú að drekka te  

Við fórum á Rossini í jólaklippinguna í gær. Þetta er eitt það almesta dekur sem mínar stelpur upplifa. Á tímabili þegar Þórdís var tveggja ára, þá bað hún um það nánast daglega að fara í klippingu  Hér er Eydís dama í klippingu, örugglega stilltasta barn sem hefur setið í þessum stól

Hér er Eydís svo að fá hjartafléttu í hárið, það er alltaf beðið um það. Þórdís fylgist vel með og heldur uppi samræðum eins og þær gerast bestar á hárgreiðslustofum.

Eydís nýklippt og fín og Þórdís komin í stólinn hjá nöfnu sinni. Þær eru flottar þessar litlu hefðardömur  

Steini er kominn með nýtt gifs sem hann þarf að hafa fram yfir áramót. Hann er hér að bjástra við ofninn í eldhúsinu sem hefur ekki hitnað nóg undanfarið. Ég fæ að skondrast eftir verkfærum útí bílskúr og snúast eitthvað í kringum hann.

Ég skrapp svo aðeins út að hlaupa áðan. Ekki samt heilsubótarhlaup þótt það hafi nú verið ágæt heilsubót líka. Ég var að hlaupa á eftir ruslatunnunni minni sem stakk af út á götu í rokinu sem var hér áðan  Það er eitthvað farið að lægja núna.

Eydís fór snemma að sofa og skórinn kominn á sinn stað í gluggann  

"Sjáðu mamma" sagði Þórdís þegar hún var búin að stilla sér upp í rúminu svo jólasveinninn mundi sjá hvað hún væri stillt og góð  svo sofnaði hún strax. En það þýðir ekki mikið að plata hana, hún tekur vel eftir öllu. Við sáum Stekkjastaur í rúvfréttum í kvöld þar sem var tekið viðtal við hann. Þórdís var fljót að sjá í gegnum það að þetta væri ekkert Stekkjastaur. "Mamma, þessi þarna er ekki með staurfót!"

Vona að þið eigið öll ljúfa helgi framundan. Knús á ykkur

Athugasemdir

[Jónína Dúadóttir, 12.12.2008 kl. 06:39]

Yndislegt

[Ásthildur Cesil Þórðardóttir, 12.12.2008 kl. 11:12]

Æ hvað það er gaman að fá að fylgjast með jólastússi barnanna, þau eru svo flott með jólasveinahúfur og alles.  Auðvitað eru þær þægar og góðar til að fá í skóinn  Ásthildur var svo óþekk í gær að við Úlfur sögðum að hún fengi örugglega kartöflu í skóinn, en hún hefur átt eitthvað inni hjá jólasveininum, þvi´hún fékk sama og Hanna Sól.  En hún var snoðuð í gær, er er bara sæt og fín núna.  En ég á eftir að láta snyrta Hönnu Sól og Úlf fyrir jólin, það má víst ekki klippa þau hvorugt.

[Sigrún Þorbjörnsdóttir, 12.12.2008 kl. 18:15]

Jónína mín;

Ásthildur mín; Jólasveinninn er með svo stórt hjarta, hann hefur ekki getað fengið af sér að gefa Ásthildi kartöflu  Annað gegnir um mig, ég fékk kartöflu í skóinn. Ætlaði að reyna að svindla á sveinka en hann fattaði allt saman, stelpunum til mikillar gleði  Hva, þurftirðu að fara með Ásthildi í klippingu? Ég hélt að stóra systir hefði séð um þetta. Vona að þú sért orðin hressari, ég er loksins orðin eðlileg aftur. 

[Helga Magnúsdóttir, 14.12.2008 kl. 19:53]

Ég fæ algjört nostalgíukast við að lesa þetta hjá þér. Man hvað það var gaman að öllu laumuspilinu með skóinn og svona þegar mínir strákar voru litlir.

[Sigrún Þorbjörnsdóttir, 16.12.2008 kl. 10:15]

Helga mín; já þetta er bara gaman  

[Ragnhildur Jónsdóttir, 18.12.2008 kl. 12:14]

Þetta er alveg meiriháttar skemmtilegt. Allir með jólasveinahúfur og stemning. Skórinn, já, nú er þetta að byrja aftur á heimilinu, Embla Sólin mín vaknar snemma til að tékka hvað hún fékk í jólaskóinn sinn.

Bestu kveðjur og knús