Haustverk og uppskeruhátíð

Það kom smá hlé í dag á rigningunni og rokinu sem er búið að vera undanfarið. Ég notaði tækifærið og dreif mig út að setja niður haustlauka. Ég setti niður túlipana, páskaliljur, anemónur og eitthvað sem heitir muscari, en ég hef ekki prófað þá tegund áður. Ætla svo að kaupa smá slatta í viðbót og setja niður fljótlega. Ég elska það á vorin að sjá blómin gægjast upp úr moldinni. Ég vona bara að allt hafi farið rétt niður, hehe, var í smá vandræðum með eina tegundina, hef bara ekki séð svoleiðis lauka áður en ég reyndi að nota innsæið til að leysa það. Það kemur svo bara í ljós í vor hvort allt birtist á réttum stað  en ég get þá allavega huggað mig við það að það er bara ég sem veit hvert þessir laukar fóru  Steinþór var að kantskera grasið svo það ætti líka að auðvelda vorverkin næst. Tóti kom svo seinni partinn og braut bílaplanið fyrir okkur. Æ það var eitthvað svo ljótt, steyptur helmingurinn af því og allt skakkt skorið. Erum að spá í að helluleggja það frekar.

Hér er Tóti mættur. Eitthvað er kallinn illur á svipinn þó svo hann hafi ekkert orðið illur  

Hér er hann að verða búinn að brjóta allt. Stelpurnar sitja í bílskúrnum og fylgjast vel með.

Það er nefnilega mjög spennandi að sjá svona gröfu vinna. Samt betra að vera "viðbúinn" þegar stéttin hrynur!

Eydís var sérstaklega spennt yfir þessu eins og sjá má

En þrátt fyrir að vera orðin einlægur aðdáandi Tóta, þá vildi hún ekki fara inní gröfuna með honum. Maður verður nú að taka þetta í smá áföngum, hehe.

Þórdís teiknaði mynd af gröfunni hans Tóta og færði honum. Hún var að vísu búin að teikna mynd af hinni gröfunni hans, hafði ekki séð litlu gröfuna áður. Mikill heiður að fá að afhenda þetta listaverk  Eydís hljóp svo inn og teiknaði mynd af hurð handa honum, voða fína  

Eydís hjálpaði pabba sínum að moka upp möl. Það var orðið frekar kalt og ég bauð henni að koma inn og horfa á barnatímann með Þórdísi. En nei, hún mátti sko ekkert vera að því. "Ég er í vinnunni með pabba" sagði hún og var mjög ábyrg í málrómnum  

Svo var líka kominn tími fyrir uppskeruna. Ég er að spá í hvort ég eigi að halda uppskeruhátíð eða hvað. Og hvort ég ætti þá að hafa hana mjög formlega eða...

...jamms. Þetta er sem sagt uppskeran úr einu blómabeðinu mínu  Þessi kálhaus spratt bara upp úr blómabeði hjá mér í sumar...hvort Hrappur og Hrekkir voru hér á ferð veit ég eigi... en þeir munu allavega þræta fyrir það eins og sprúttsalar  

Bestu kveðjur til ykkar

Athugasemdir

[Ásthildur Cesil Þórðardóttir, 29.9.2008 kl. 10:49]

Dugleg mín að setja niður lauka.  Ég á eftir að setja niður svona 7000 stk.  Eða láta gera það.  Það er alveg rétt, að ekkert er flottara en á vorin þegar laukarnir gægjast  upp úr moldinni.  Þetta með að hvernig laukurinn á að snúa, þá er oftast hægt að sjá smá rótarenda þar sem ræturnar eru, og far eftir stilk þar sem hann vex upp.  Ef maður er alveg í óvissu, þá er best að láta laukinn liggja á hliðinni, þá kemst hann bæði upp og niður. 

En þetta eru yndislega myndir, og yndislegar stelpur.  Minna mig á mínar skottur.  Og kálhausinn flottur. 

[Sigrún Þorbjörnsdóttir, 29.9.2008 kl. 22:59]

Ég vona að skrýtnu laukarnir hafi snúið rétt hjá mér. Ég sá á sumum þeirra örla fyrir smá rót, svo kemur hitt í ljós  Ég er alveg sammála með stelpurnar, þínar skottur minna mig ofsalega á mínar