Gleðidagur með fallegu fólki

Laugardagurinn var sannkallaður gleðidagur. Ég missti reyndar af Gleðigöngunni þetta árið. Vinir okkar og nágrannar, Eva og Rabbi, voru að gifta sig þennan dag, og fór bæði athöfnin og veislan fram í garðinum heima hjá þeim. Veðurguðirnir voru okkur hliðhollir þennan dag, alveg logn, svo kom smá rigning rétt fyrir athöfnina, en svo stytti upp og sólin skein í sjálfri athöfninni. Það rigndi svo smá um kvöldið en það kom ekki að sök, því risastóru tjaldi var búið að koma fyrir í garðinum. Ég verð bara að segja það, að þetta er lang skemmtilegasta brúðkaup sem ég hef komið í. Athöfnin var látlaus og allt andrúmsloft svo afslappað og þægilegt. Þarna var mikið af hæfileikafólki, og voru það vinir og ættingjar sem sáu um öll skemmtiatriði.

Þessi mynd er dæmigerð fyrir það hvað það var afslappað andrúmsloftið. Myndin er tekin einum og hálfum tíma fyrir brúðkaup, og þarna er sjálfur brúðguminn í rólegheitum að skrúbba rúðurnar.

Hér eru gestirnir búnir að koma sér fyrir inni í tjaldi og brúðhjónin mæta á svæðið.

Hér er búið að útbúa fallega kapellu í garðinum. Það var séra Auður Inga sem gaf brúðhjónin saman og var gaman að hlusta á það sem hún hafði að segja við brúðhjónin.

 

 

Hér eru það krúttmolarnir þeirra, Hafþór og Hilmir, sem færa þeim hringana.

Og svo er það kossinn sem innsiglar hjónabandið

Hér eru Nonni á gítar og Guðbjörg vinkona Evu, að spila og syngja eftir athöfnina.

Lukku Láki sá um matinn sem var algjört sælgæti, heilgrillað lamb, kjúklingur og meðlæti. Hér er Láki ásamt starfsmanni sínum að hafa allt klárt.

Þórdís og Eydís fengu að vera með þar til eftir matinn. Þær voru búnar að fylgjast með undirbúningnum og fannst þetta virkilega spennandi. Þórdísi finnst ekki nógu gott að ég sé gift, hún er búin að spyrja mig hvort ég geti ekki gift mig aftur  

Það voru skemmtilegar ræður haldnar í veislunni. Ég var svo fegin að vera ekki eina grenjuskjóðan á svæðinu, því ég grét held ég allan tímann. Ekki af sorg, heldur af gleði. Hér eru brúðhjónin ásamt fjölskyldum sínum í hláturskasti, á meðan vinkonur Evu gera grín að grátkonunni miklu, en Eva er þekkt fyrir mikla tilfinningasemi.

Það voru margir listamenn á staðnum. Hér eru Fanný og Dóri, vinir og nágrannar, að spila og syngja fyrir brúðhjón og gesti.

Hér er Agnar, líka nágranni, og Nonni með atriði sem sló rækilega í gegn. Agnar samdi snilldarlegan texta, um Rabba, sem er sjómaður, að metast um sína frú við skipsfélaga sína, Snyrtifrúin, en Eva er snyrtifræðingur sem rekur Snyrtistofuna Fögru hér í bæ.

Eva er líka þekkt fyrir að syngja allan daginn, alveg frá hjartanu. Hún ætlaði ekkert að syngja hér en varð að láta undan þrýstingi veislugesta, svo hér er hún mætt að taka lagið.

Hér eru veislustjórarnir, Sara og Dóri, komin með brúðhjónin í leik þar sem þau þurfa bæði að svara spurningum án þess að sjá svarið hjá hinum. Þau voru bara merkilega sammála og hreinskilin  held þau hafi örugglega fengið 9,5

Hér er Þröstur, bróðir Evu, að taka lagið. Hann söng nokkur lög af mikilli innlifun.

Hér eru svo Fögru konurnar, Eva, Christine og Ása. Steinþór er einmitt með sína nuddstofu hjá þeim.

Hér er svo afmælisbarn dagsins. Lárus, yndislegi fóstursonur minn, er nítján ára í dag. Hann er í Noregi, því miður fyrir hann, því ég ætla að baka stóra "Sigrúnartertu" sem er uppáhaldið hans, og verð bara að borða hana alla sjálf  Til lukku með daginn, elsku Lalli minn

 

 

Athugasemdir

[Tiger, 13.8.2008 kl. 03:12]

Æðislegar myndir - greinilegt að það hefur verið gaman í brúðkaupinu. Það er líka alltaf svo miklu skemmtilegra ef hægt er að halda svona veislur heima - eða svona úti. Ef veður er hlýtt og þurrt þá er það einmitt brilljand að gera þetta svona. Til hamingju með þessi brúðhjón - og til hamingju með 19 ára ská/töffarann þinn! Hafðu ljúfa nótt skottið mitt og yndislegan dag á morgun!

[Sigrún Þorbjörnsdóttir, 13.8.2008 kl. 22:33]

Takk TíCí minn. Já það verður oft skemmtilegra andrúmsloft í svona heima-veislum. Tala nú ekki um ef skemmtiatriðin eru líka svona heimatilbúin. Knús á þig ofurtöffari

[Heiður Þórunn Sverrisdóttir, 14.8.2008 kl. 08:42]

Flottar myndir úr brúðkaupinu hjá Evu og Rabba.

Til hamingju með Lalla afmælisstrák.

Og svo kveðja knús til ykkar frá okkur hér.