Vorverkin

Hálfnað verk þá hafið er, er það ekki? Sumarið lét aðeins á sér kræla í síðustu viku og þá lét ég mig hverfa út í garð. Mér finnst alltaf jafn gaman að gera vorverkin í garðinum og sjá gróðurinn lifna við. Svo er maður alltaf að reyna að gera eitthvað fínt líka.

Steini var að kantskera. Stelpurnar "hjálpuðu" til við að koma úrgangnum í safnhauginn.

Svo fengu þær að keyra traktorinn og það var gaman. Hér er Þórdís að spreyta sig. Ég viðurkenni samt alveg að móðurhjartað tók smá kipp við að horfa á þetta en pabbi gekk meðfram og passaði allt.

Og svo Eydís, hún vandaði sig mjög mikið við að keyra.

Eydís einbeitt að keyra.

Hér er ég búin að snurfusa fiskabeðið. Það fékk þetta nafn því það stækkaði alltaf smám saman og varð eins og fiskur út á túnið. Myndin er síðan í síðustu viku og nú er gróðurinn miklu grænni.

Hér er svo aðstoðardaman mín í beðunum komin í pásu. "Vinnumenn" verða að hvíla sig líka  

Svo fórum ég og Dorrit Engill í smá göngu að skoða hraunið. Þetta er beint fyrir neðan garðinn minn. Mér finnst æði að hafa bara náttúruna fyrir neðan okkur og svo tekur við sjórinn og við hlustum á brimið hér á kvöldin.

Hún er svo stillt og góð. Kemur um leið og ég kalla á hana.

Svo fengum við okkur smá lúr í grasinu. Ef þetta er ekki að sleikja sólskinið, þá veit ég ekki hvað  

"Mamma, sjáðu hvað ég kemst langt á grindverkinu. Viltu taka mynd af mér að klifra?"

Litlu pottaskrímslin í kvöld og Katrín vinkona Þórdísar. Stelpurnar mundu alveg vilja vera í pottinum endalaust, sulla og leika sér. Enda eru þær, og krakkarnir í kring, dugleg að fara í pottana hjá hvort öðru. Þannig má líka krækja sér í "aukaferð" í pottinn þann daginn

Túlipanar eru eitt af uppáhalds vorboðunum mínum. Silfursóleyin er líka aðeins byrjuð að blómstra.

Sumarblómin bíða allavega fram á miðvikudag, þá verður vonandi orðið óhætt að setja þau út. Ég geymi þau í bílskúrnum og opna fyrir þeim á daginn. Ég vona að það sé ekki ónýtt það sem ég setti niður í síðustu viku  Ég er alveg "on time" að klára garðinn. Ég miða alltaf við að hafa garðinn fínan á sjómannadaginn, eða í vikunni á undan, þegar Sjóarinn síkáti byrjar. En jamm, auðvitað klárar maður aldrei garðinn, ég er að dunda mér í honum allt sumarið  

Vona að vikan verði góð hjá ykkur, verum góð hvort við annað. Knús á ykkur  

Athugasemdir

[Ragnhildur Jónsdóttir, 26.5.2009 kl. 16:40]

En yndislegt hjá ykkur. Alltaf svo mikil gleði og mikið um að vera. Það er auðvitað algjör draumur að hafa náttúruna óspillta við dyrnar og svo brimið í hæfilegri fjarlægð gaman gaman að fá að skoða myndirnar

[Jónína Dúadóttir, 27.5.2009 kl. 11:00]

Frábær lóðin ykkar og greinilega mikið fjörKnús til þín elskuleg

[Sigrún Þorbjörnsdóttir, 27.5.2009 kl. 15:05]

Ragnhildur mín; mér finnst ég vera á draumastað hérna, er alveg búin að skjóta rótum hér. Gaflarinn á heimilinu er stundum að reyna að sjarma fyrir mér Hafnarfjörðinn aftur, en ég er mjöööög treg. Finnst svo æðislegt frelsið hjá krökkunum hérna, náttúran, jarmið í lömbunum, hestanærvera, brimið, jamm, og allt bara, sem heldur í mig. Þetta er ekki ósvipað Hafnarfirði og Mosó í gamla daga  Þið þurfið endilega að kíkja við einhvern tíman þegar þið farið "á rúntinn"

[Sigrún Þorbjörnsdóttir, 27.5.2009 kl. 15:07]

Jónína mín; þakka þér fyrir  Hér er alltaf nóg af fjörinu, það fylgir ungviðinu og hressir mann  Knús á þig mín kæra

[Ragnhildur Jónsdóttir, 30.5.2009 kl. 19:49]

Hvernig er hjá ykkur í Grindavíkinni þessa dagana? Leikur allt á reiðiskjálfi? Vona að allt sé í lagi hjá ykkur og ekkert skemmst.

Og takk, við værum alveg vís með að kíkja á ykkur á rúntinum. Ég vara þig samt við fyrst

knús og kveðjur

[Sigrún Þorbjörnsdóttir, 30.5.2009 kl. 23:25]

Ragnhildur mín; ég skellti bara ísdollunni á eldhúsborðið og eftir 5 mínútur kom ég og sótti sjeikinn  Nei það er nú kannski ekki alveg svo slæmt. Það hristist sæmilega húsið í gærkvöldi en ég hef ekki orðið vör við neinar skemmdir og stelpurnar pollrólegar yfir þessu. Einu "alvarlegu" aukaverkanirnar af þessu var fimm tíma rafmagnsleysi í morgun og mín frekar spæld yfir kaffileysinu  En ég á svo dásamlegan nágranna sem þekkir þessa kaffikerlingu og hann "grillaði" kaffi og kom færandi hendi til mín  Það var reyndar líka frekar svalt hérna, því nú erum við með varmaskipti og hann gengur fyrir rafmagni, en engum varð meint af því.

Verið velkomin, það verður bara gaman að fá ykkur í heimsókn. Knús og takk fyrir hugulsemina